Á döfinni

Innskráning

Nýskráning

Fimmtudagur, 27 Október 2022 15:41

Grandfundur 5. nóvember 2022

Ritað af

Nú líður að næsta fundi á Grand sem haldinn verður laugardaginn 5. nóvember. Spilað verður fyrri hluta fundar eins og verið hefur og síðan borið fram kaffi og meðlæti. Við fáum gest í heimsókn, Kristínu Sigurvinsdóttur, sem ætlar að koma og lesa upp úr bók sinni Dætur hafsins.
Á októberfundi var þátttakendum boðið að skrá sig á nóvemberfund og þáðu það um 40 manns. Þeir þurfa ekki að skrá sig á næsta fund, en gott að láta vita ef þeir komast ekki. Þeir sem hafa hug á að mæta sendi póst til Kristínar Ísfeld (This email address is being protected from spambots. You need JavaScript enabled to view it.) eða
Guðmundar Kristmundssonar (This email address is being protected from spambots. You need JavaScript enabled to view it.). Það virðist vaxandi áhugi á starfsemi félagsins og nýir félagar velkomnir á fundinn. Það er mikilvægt að láta vita svo veitingar verði í samræmi við fjölda. Aðgangseyrir er 2500 kr og greiðist ípeningum.
Bestu kveðjur frá stjórn fke

 

 

Fimmtudagur, 05 Maí 2022 18:50

Reykjanesferð 20. 06. 2022

Ritað af

Ferðalýsing:

Kl. 08:30, lagt af stað frá Reykjavík. Farið frá bílastæðinu norðan við hús Menntavísindasviðs H.Í. við Stakkahlíð. Stefnan tekin á Grindavík. Ekin Krýsuvíkurleið meðfram Kleifarvatni, hugsanlega stoppað við hverasvæðið í Seltúni. Ekið inn á Suðurstrandarveg og til vesturs um Ögmundarhraun, kíkt á nýja hraunið og til Grindavíkur. Tekinn hringur um Þórkötlustaðanes/Hópsnes. Kíkt í gróðurhúsið hjá Orf líftækni, þar sem Björn Örvar ræður ríkjum. Kynning á einu merkasta nýsköpunarfyrirtæki landsins. 
Salthúsið, léttur hádegisverður í Grindavík.
Lagt af stað í átt að Reykjanesi. Mett og glöð tökum við stefnuna á Reykjanestá en á leið þangað kíkjum við á náttúrufyrirbrigðið Brimketil, lítum á hverasvæðið og kynnumst Auðlindagarðinum á Reykjanesi. Saga skipstranda og mannskaða sögð. Kynnt hin frábæra gönguleið - Gígaröðin. Nú er brunað í átt til Hafna sem eiga sér merka sögu allt frá landnámstíð. Stoppað hjá rústunum af stórbýlinu Kotvogi. Sagan af Jamestown, draugaskipinu sem rak á land. Við rennum framhjá Básendum, sem var verslunarstaður svæðisins allt þar til í Básendaflóðinu mikla árið 1799. Hvalsneskirkja heimsótt en henni þjónaði Hallgrímur Pétursson og bjó þar með Guðríði sinni. Reynir Sveinsson segir frá kirkjunni.
Eftir kirkjuheimsóknir rennum við í gegnum Sandgerði og áfram fram hjá merkum stöðum þar til við komum að Garðskagavita. Þar býður okkar þar kaffihressing en áður verður farið inn í vitann og sungið við einstök hljómgæði. Með kaffi og vöfflur að vopni rennum við um Ásbrú, gamla hersvæðið og fræðumst um uppbyggingarstarfið þar.
Kl.18:30. Marriott hótel, Þriggja rétta kvöldverður í nýja hótelinu í Reykjanesbæ.
Heimferð um kl. 20:30. Vonandi þreytt en glöð sem við ökum eftir Reykjanesbraut til höfuðborgarinnar. Fararstjóri verður Hjálmar Waag Árnason sem bjó í yfir 30 ár á Suðurnesjum en Grindvíkingurinn fyrrverandi, Gunnlaugur Dan er vís með að greina frá einhverjum leyndarmálum um Grindvíkinga fyrr og nú. Aðrir hvattir til að leggja vitleg orð í belg eftir því sem tilefni gefst og andi kviknar fólki í brjóst. Heimkoma ráðgerð kl. 21:30. Verð, þar sem allt er innifalið er kr.14.000 fyrir hvern einstakling. Ferðin er niðurgreidd af hálfu félagsins. Skráning í ferðina gerist með því að greiða fyrir ferðina inn á reikning 0313-26-004211, kt. 421190-1359 og skrá sig í ferðina samdægurs á heimasíðu félagsins w.w.w.fke.is. Látið koma fram fyrir hverja er greitt.

24. maí verður efnt  til menningarferðar austur fyrir fjall, þar sem lögð verður áhersla á að heimsækja áhugaverða staði í Flóanum, bæði sögulega og aðra sem vert er að kynnast.
Dagskrá:
Kl. 09:00. Lagt af stað frá bifreiðastæði norðan við hús Menntavísindasviðs H.Í. við Stakkahlíð og haldið austur fyrir fjall.
Á Drottningarbarmi á Kambabrún munum við hitta fyrir leiðsögumann ferðarinnar Guðna Ágústsson.
Þaðan verður haldið í Konungshúsið í Miðbæ Selfoss þar sem drukkið verður kaffi með flatköku.
Í framhaldinu verður hinn nýi miðbær á Selfossi skoðaður, en hann hefur hlotið verðskuldaða athygli margra sem gert hafa sér ferð austur til þess að berja hann augum.
Næst verður Skyrsafnið heimsótt. Þaðan verður farið að Laugardælakirkju, Bobby Fischer heiðraður og sagt frá nánast reifarakenndum eftirmálum eftir fráfall Fischers.
Kl. 12:30. Hótel Selfoss. Tveggja rétta máltíð með kaffi á eftir.
Eftir hádegisverð verður ekið að hinum gamla höfuðstað Eyrarbakka, þar sem elsti barnaskóli landsins er. Á Stokkseyri skoðum við merkilegt Veiðisafn, áður en haldið verður að Urriðafossi.
Þaðan munum við fara að Brúnastaðaflötum og kynnast Flóaáveitunni, því mikla mannvirki. Þegar hér er komið mun verða hugað að heimferð,
aðeins eftir að koma við á huggulegum kaffiveitingastað og fá hressingu áður en lagt verður af stað til Reykjavíkur. Áætlað er að vera kominn í bæinn kl. 18:15.

Laugardagur, 29 Janúar 2022 16:05

Færeyjaferð

Ritað af

FÆREYJAR 23.-27. maí.

Ákveðið er að bjóða upp á ferð til Færeyja dagana 23.-27. maí næstkomandi. Hjálmar Árnason skipuleggur ferðina og verður leiðsögumaður. Lýsing á ferðinni fylgir hér með í viðhengi. Heildarverð er 125.000 og þar er margt innifalið. Ferðin er bókuð með þeim hætti að senda staðfestingargjald, 25.000 kr. (pr. mann) á reikning Hjálmars, kt.151150-2179 Banki: 0542 14 000524  Netfang hans er This email address is being protected from spambots. You need JavaScript enabled to view it.  Mikilvægt er að bóka fyrir 6. febrúar þar sem flug er ásetið og flugfélag ekki tilbúið að halda sætum lengur. Einnig er nauðsynlegt að senda Hjálmari nöfn svo hægt sé að ganga frá bókunum á hótel. Svo virðist sem Færeyjar séu áhugaverður áfangastaður fyrir ýmsar þjóðir.

Góðir félagar
Stjórn Félags kennara á eftirlaunum sendir ykkur góðar kveðjur með óskum um gott ár. Liðið ár var um sumt erfitt og við urðum að fella niður fáeina viðburði vegna faraldursins. Okkur tókst samt að fara í góðar ferðir og sækja nokkra áhugaverða viðburði. Því miður verðum við að fella niður Grandfund 5. febrúar næstkomandi vegna fjöldatakmarkana.
Stefna okkar er að halda áfram og bjóða upp á ýmislegt sem gleður og fræðir.  Það verður auglýst í næsta fréttablaði sem kemur út í febrúar. Nú þegar er farið að vinna að ferðum sumarsins og t.d. ákveðið að bjóða upp á svipaða ferð um Reykjanes og farin var í fyrra. Sú ferð var mjög vinsæl og ekki komust allir í hana sem vildu. Fáeinar ferðir eru í mótun, meðal annars er verið að kanna þriggja daga ferð, líklega um landið norðaustanvert.

Þriðjudagur, 23 Nóvember 2021 10:17

Grandfundur 4. desember

Ritað af

Laugardaginn 4. desember kl. 13.30 komum við saman til næsta fundar okkar á Grandhóteli. Hann verður með svipuðu sniði og síðasti fundur, sem þótti takast vel. Munur er samt sá að þessi litast af aðventu og jólum.

Spilað verður fyrsta klukkutímann og síðan borið fram kaffi með góðu meðlæti. Kór félagsins hefur æft stíft undanfarið og við fáum að njóta þess og ekki kæmi á óvart að endað væri með fjöldasöng og jólakveðjum.

Við verðum að kanna þátttöku eins og síðast og biðjum ykkur að hafa samband við Kristínu Ísfeld, netfang: This email address is being protected from spambots. You need JavaScript enabled to view it. , sími: 6967570. Vinsamlegast takið með ykkur grímur.

Þátttökugjald er sem áður 2000 kr. sem þið eruð vinsamlega beðin um að koma með í reiðufé.

Við hlökkum til að sjá ykkur sem flest.

Fimmtudagur, 21 Október 2021 15:24

Grandfundur 6. nóvember

Ritað af

Góðir félagar

Stjórnarmenn í félagi okkar senda góðar kveðjur og vona að haustið taki vel á móti ykkur, já eða þið á móti því. Við þökkum kærlega fyrir fyrsta fundinn á Grandhóteli í langan tíma. Salurinn var fullskipaður og gott hljóð í fólki.

Nú er komið að því að halda næsta fund, 6. nóvember. Húsið verður opnað um kl 13.00 og spilamennska hefst kl. 13.30. Spilað verður til á að giska 14.30, en þá heldur samkoman áfram og þeir sem ekki spila eru velkomnir, hvort sem þeir koma á meðan á spilamennsku stendur eða í lok hennar.

Á boðstólum verður fínt kaffihlaðborð að vanda og séð verður fyrir einhverju til að létta lundina.

Aðgangur er 2000 kr. og eru menn beðnir um að koma með peninga, þar sem ekki er unnt að taka við kortum.

Hótelið þarf að fá upplýsingar um fjölda svo þið eruð beðin um að senda okkur línu á eftirfarandi póstföng: Guðmundur B. Kristmundsson This email address is being protected from spambots. You need JavaScript enabled to view it. (sími 8644702) eða Kristín Ísfeld  This email address is being protected from spambots. You need JavaScript enabled to view it..

Bestu kveðjur,

Stjórn FKE

Mánudagur, 13 September 2021 15:05

Aðalfundur 2.. október

Ritað af

Laugardaginn  2. október kl. 12.30 verður efnt  til hátiðarfundar á Grandhóteli.
Samkoman hefst á góðum hádegisverði og í kjölfar hans mun Gissur Páll Gissurarson söngvari skemmta og síðan tekur Þórður Helgason háskólakennari og rithöfundur við og flytur sjálfvalið  efni á þann hátt sem honum er einum lagið. Vegna veislufanga er nauðsynlegt  að félagar skrái sig á þennan viðburð í síðasta lagi 24. september. Lágmarksfjöldi er 50. Sendið tölvupóst til Kristínar Ísfeld <This email address is being protected from spambots. You need JavaScript enabled to view it. eða Guðmundar B. Kristmundssonar This email address is being protected from spambots. You need JavaScript enabled to view it.. Þau munu staðfesta skráninguna. Aðgangseyrir er 2000 kr (matur innifalinn). Vinsamlega komið með 2000 kr í peningum þar sem félagið getur ekki tekið við kortum.
Í lok fundar verður aðalfundur félagsins.
Efni: Formaður flytur skýrslu um störf stjórnar og viðburði. Gjaldkeri gerir grein fyrir fjárhag. Ekki verður um að ræða breytingar á stjórn að þessu sinni og er það samkvæmt lögum félagsins. Önnur mál.

Mánudagur, 28 September 2020 11:37

Gönguferðir

Ritað af

Ganga FKE sem stofnað var til fyrir tveimur árum hefur notið vinsælda og nú er kominn fastur kjarni sem mætir galvaskur á mánudögum kl. 13:00, gengur í klukkutíma og svo leitum við uppi kaffistað og spjöllum saman yfir kaffibolla, þeir sem það vilja. Þriðja starfsárið er hafið og hefur þátttaka verið góð, 17-18 manns í hvert skipti.Þeir sem hafa áhuga á að taka þátt hafi samband með tölvupósti við göngustjórana Pétur (This email address is being protected from spambots. You need JavaScript enabled to view it.) eða Valborgu (This email address is being protected from spambots. You need JavaScript enabled to view it.), því mætingarstaður er boðaður með netpósti og valin staðsetning eftir veðurhorfum og færð hverju sinni. Veður er aldrei fyrirstaða en klæðnaður valinn í samræmi við aðstæður.

Mánudagur, 28 September 2020 11:33

Blásið til aðalfundar

Ritað af

Vegna kórónuveirunnar  frestaðist aðalfundur félagsins í apríl sl.  Með þeim fyrirvara að ástandið næstu daga versni ekki er ætlunin að halda aðalfund 3. október n.k. á Grand hóteli  kl. 13:30, með venjulegum aðalfundarstörfum.  Hugað verður vel að fjarlægðarmörkum og sóttvörnum.   Að loknum fundarstörfum verða veitingar og síðan munu Bergþór Pálsson og Albert Eiríksson koma fram og létta okkur lund með söng og gamanmálum.

Page 1 of 3