Okkar dásamlegi kór lauk söngárinu með áhugaverðri vorferð til Hafnarfjarðar. Jónatan Garðarsson, innfæddur Gaflari, leiddi kórfélaga um götur bæjarins og fræddi okkur um sögu kaupstaðarins, húsin í bænum og fólkið sem byggði bæinn. Þetta var einhver lengsti göngutúr sem menn muna því hann hófst kl. 12:00 og lauk kl. 18:00. En dýrðarinnar veður gerði þessa fróðlegu gönguferð ógleymanlega. Vinum bæjarins fjölgaði.

Kórinn söng fyrir Karmelsystur í kapellu klaustursins og luku þær systur okkur kórfélögum lofsyrðum fyrir komuna og sönginn. Kórfélagar skoðuðu Minjasafn Hafnarfjarðar í gamla Pakkhúsinu. Húsið stóð við fjöruborðið áður en uppfyllingar hófust meðfram sjónum en er nú komið vel inn á land.  

Starfsár EKKÓ kórsins hefur verið ákaflega heillandi. Vikulegar æfingar alla mánudaga í Áskirkju kl. 11:00 - 12:45. Skemmtileg lög og stjórnandinn Bjartur Logi léttur en skipulagður. Kórinn hefur komið fram á félagsfundum FKE, sungið við messur í Áskirkju og jólalögin á dvalarheimilum. Rúmlega 40 félagar hófu æfingar í haust sem er góður fjöldi. En alltaf er þörf á endurnýjun og fleiri félögum. Eftirlaunakennarar eldast og láta gott heita og menn veikjast í lengri eða skemmri tíma. Kennarar á eftirlaunum eru heldur ekki eftirbátar annarra ellismella við að sækja til Tenerife og Kanarí yfir skammdegistímann. Æfingar EKKÓ kórsins hefjast að nýju í haust og eru söngelskir kennarar á eftirlaunum hvattir til að slást í hópinn og njóta gleðinnar í söng og starfi.

Gleðilegt sumar.