Ferð um sunnanverða Vestfirði 26.-27. júní

Lagt verður af stað frá Kennaraskólanum við Stakkahlíð kl. 8:00 þann 26. júní. Ekið verður sem leið liggur um Borgarfjörð og Dali, það söguríka svæði. Úr Dölum er ekið um Saurbæ, yfir Gilsfjarðarbrú, það mikla samgöngumannvirki, og í Króksfjarðarnes. Þar er fallegt handverkshús þar sem mögulegt er að sinna kalli náttúrunnar og skoða handverk kvenna af svæðinu. Áfram er haldið yfir splunkunýja brú yfir Þorskafjörð, í gegnum þrætueplið mikla, Teigsskóg, og sem leið liggur í Flókalund. Þar er snæddur hádegisverður. Þaðan liggur leið upp á Dynjandisheiði, til Bíldudals. Þess má geta að algengt er að sjá Haferni á flugi eða sitjandi á kletti. Áfram er ekið í gegnum Bíldudal út í Selárdal, þar sem við skoðum hið einstaka safn „listamannsins með barnshjartað“, Samúels Jónssonar og svipumst um á heimaslóðum Gísla á Uppsölum. Ökum til baka til Bíldudals. Þar verður litið við á hinu stórmerkilega Skrímslasetri. Fáum okkur hressingu þar áður en haldið er yfir til Tálknafjarðar og Patreksfjarðar. Tökum rúnt um bæinn og höldum síðan í náttstað á Fosshóteli Patreksfirði. Þar munum við eiga, eins og vænta má, skemmtilega og notalega kvöldstund og göngum glöð til náða, ölvuð af vestfirskri náttúrufegurð.